Xabar berib o‘tganimizdek, baydarka va kanoeda eshkak eshish bo‘yicha yakkalik bahslarida ishtirok etgan hamyurtimiz Gulbahor Fayziyeva oltin medal egasiga aylandi.
U Milliy olimpiya qo‘mitasining Matbuot va media departamentiga bergan intervyusida Argentinaga aynan shuning uchun borganligini ta’kidlab o‘tdi.
«Olimpiya o‘yinlari oldidan oldimga faqatgina bir maqsadni qo‘ygandim – chempion bo‘lish! Oltindan boshqa variantlarni o‘ylab ham ko‘rmagandim. Beshta bahs ketma-ket bo‘lgani qiyinchilik tug‘dirdi. Qizlar o‘rtasidagi bellashuvlarda odatda ko‘pi bilan ikkita poyga o‘tkazilardi. Birinchi chiqishdan so‘ng 1,5 soat dam oldim.
Keyingi start oldidan esa 3 soat vaqt bo‘ldi. Undan keyingi bahslarda esa tanaffus bor-yo‘g‘i 30 daqiqani tashkil etdi. Qo‘llab-quvvatlagan barchaga rahmat. O‘z maqsadimga yetisha oldim. Bundan juda faxrlanaman. Iroda, xarakter va intilish – muvaffaqiyatning asosiy omilidir», – dedi sportchi.