Хабар бериб ўтганимиздек, байдарка ва каноэда эшкак эшиш бўйича яккалик баҳсларида иштирок этган ҳамюртимиз Гулбаҳор Файзиева олтин медаль эгасига айланди.

У Миллий олимпия қўмитасининг Матбуот ва медиа департаментига берган интервьюсида Аргентинага айнан шунинг учун борганлигини таъкидлаб ўтди.

«Олимпия ўйинлари олдидан олдимга фақатгина бир мақсадни қўйгандим – чемпион бўлиш! Олтиндан бошқа вариантларни ўйлаб ҳам кўрмагандим. Бешта баҳс кетма-кет бўлгани қийинчилик туғдирди. Қизлар ўртасидаги беллашувларда одатда кўпи билан иккита пойга ўтказиларди. Биринчи чиқишдан сўнг 1,5 соат дам олдим.

Кейинги старт олдидан эса 3 соат вақт бўлди. Ундан кейинги баҳсларда эса танаффус бор-йўғи 30 дақиқани ташкил этди. Қўллаб-қувватлаган барчага раҳмат. Ўз мақсадимга етиша олдим. Бундан жуда фахрланаман. Ирода, характер ва интилиш – муваффақиятнинг асосий омилидир», – деди спортчи.