Франция президенти Эммануэль Макрон ЖЧ-2026 доирасида Испанияга қарши ўйин олдидан бир дақиқалик сукут сақланишини маълум қилди. Жаҳон чемпионатининг ярим финал учрашуви сешанба, 14 июль куни Тошкент вақти билан соат 00:00 да бўлиб ўтади.
"Франция ва Испания ўртасидаги ўйин олдидан 2016 йил 14 июлдаги Ниццадаги теракт қурбонлари хотирасига бағишланган бир дақиқалик сукут эълон қилинади. Франция илтимосига ижобий жавоб бергани учун ФИФА президентига ташаккур билдираман. Биз буни ҳеч қачон унутмаймиз", - деб ёзди Макрон X ижтимоий тармоғида.
2016 йил 14 июль оқшомида Ниццанинг Инглизлар қирғоғида Бастилия куни шарафига ўтказилган пиротехника шоусини томоша қилиш учун йиғилган оломон устига юк машинаси ҳайдалган эди – гувоҳларнинг сўзларига кўра, ҳайдовчи имкон қадар кўпроқ одамни босиб кетиш учун машинани зигзаг шаклида бошқарган. Теракт оқибатида 86 киши ҳалок бўлган, яна 458 киши тан жароҳати олган эди. Юк машинаси ҳайдовчиси, тунислик Муҳаммад Лауэж Булель полиция томонидан йўқ қилинган.
