20 oktyabr kuni “Dinamo” futbol klubi a’zolari Samarqand shahrida joylashgan bolalar va o‘smirlar futbol akademiyasiga tashrif buyurishdi.

“Dinamo” klubi barcha futbolchilari, jamoa bosh murabbiyi Davron Fayziyev, bosh menejer Ilhom Sharipov, klub sport direktori Rustam Istamov ishtirok etgan tadbirda klub va viloyat bolalar-o‘smirlar futbol akademiyasi o‘rtasida o‘zaro bog‘liqlik yanada mustahkamlandi. Tadbirni Samarqand viloyat futbol Assosiasiyasining vise-prezidenti Shuhrat Sayfullayev va akademiya direktori Vladimir Gurshumov ochib berdi.

Dastlab, “Dinamo” futbolchilari akademiya tarbiyalanuvchilari bilan o‘zaro tanishib, so‘ng ularga “master-klass” o‘tkazishdi, birga mashg‘ulotlarga kirishishdi. Shundan keyin akademiyaning turli yoshdagi ishtirokchilari bilan o‘zaro jamoalarga bo‘linib, birga futbol o‘ynashdi.

Tadbir davomida Uchqun Qobilov va akademiyaning bir qator malakali murabbiylari qo‘l ostida futbol sir-asrorlarini o‘rganayotgan tarbiyalanuvchilar “Dinamo” futbolchilariga o‘zlarini qiziqtirayotgan savollari bilan murojaat etishdi.

Qiziqarli va do‘stona ruhda o‘tgan uchrashuv yosh futbolchilarga katta taassurot qoldirdi. Tadbir yakunida viloyat futbol akademiyasi va klub o‘rtasida mana shunday uchrashuvlarni tez-tez o‘tkazishga kelishib olindi.

Ma’lumot uchun, Samarqand bolalar va o‘smirlar futbol akademiyasiga har bir yosh toifasidan 22 tadan umumiy 154 nafar o‘quvchi qabul qilingan bo‘lib, hozirda ular faol ravishda mashg‘ulotlar olib borishmoqda.

“Dinamo” klubi matbuot xizmati.