Avvalroq Buyuk Britaniyaning Manchester shahrida taekvondo bo‘yicha Gran-Pri musobaqasi bo‘lib o‘tishi haqida xabar bergan edik.

O‘zbekiston taekvondo assosiasiyasi rahbariyati musobaqadan unumli foydalanish maqsadida bir qator davlatlarning taekvondo federasiyalari vakillari bilan uchrashuvlar tashkil qildi.

Xususan, Buyuk Britaniya taekvondo federasiyasi raisi Yuliya Nyuton hamda O‘zbekiston taekvondo assosiasiyasi bosh kotibi Abduazim Isroilov o‘rtasida o‘tkazilgan uchrashuvda hamkorlikni rivojlantirish, qo‘shma o‘quv-mashg‘ulot yig‘inlari tashkil etish va boshqa bir qator masalalar yuzasidan kelishuvga erishildi va memorandum imzolandi.

Unga ko‘ra, ikki karra Olimpiya o‘yinlari chempioni Jeyd Jons, jahon chempionati sovrindorlari Byanka Uolkden, Muhammad Lutalo kabi sportchilar O‘zbekistonga kelib, mashg‘ulot o‘tkazadigan va o‘z tajribalarini o‘zbekistonlik yosh sportchilar bilan bo‘lishadigan bo‘ldi. Bundan tashqari, kelasi yili Manchester shahrida o‘tkaziladigan jahon chempionati oldidan O‘zbekiston terma jamoasining o‘quv-mashg‘ulot yig‘inlari Buyuk Britaniyada tashkil etiladi. Shuningdek, O‘zbekiston taekvondo assosiasiyasining murabbiy, psixolog, shifokor va boshqa mutaxassislari Buyuk Britaniyada malaka oshirish imkoniyatiga ega bo‘ladi.