Аввалроқ Буюк Британиянинг Манчестер шаҳрида таэквондо бўйича Гран-При мусобақаси бўлиб ўтиши ҳақида хабар берган эдик.

Ўзбекистон таэквондо ассоциацияси раҳбарияти мусобақадан унумли фойдаланиш мақсадида бир қатор давлатларнинг таэквондо федерациялари вакиллари билан учрашувлар ташкил қилди.

Хусусан, Буюк Британия таэквондо федерацияси раиси Юлия Ньютон ҳамда Ўзбекистон таэквондо ассоциацияси бош котиби Абдуазим Исроилов ўртасида ўтказилган учрашувда ҳамкорликни ривожлантириш, қўшма ўқув-машғулот йиғинлари ташкил этиш ва бошқа бир қатор масалалар юзасидан келишувга эришилди ва меморандум имзоланди.

Унга кўра, икки карра Олимпия ўйинлари чемпиони Жэйд Жонс, жаҳон чемпионати совриндорлари Бьянка Уолкден, Муҳаммад Лутало каби спортчилар Ўзбекистонга келиб, машғулот ўтказадиган ва ўз тажрибаларини ўзбекистонлик ёш спортчилар билан бўлишадиган бўлди. Бундан ташқари, келаси йили Манчестер шаҳрида ўтказиладиган жаҳон чемпионати олдидан Ўзбекистон терма жамоасининг ўқув-машғулот йиғинлари Буюк Британияда ташкил этилади. Шунингдек, Ўзбекистон таэквондо ассоциациясининг мураббий, психолог, шифокор ва бошқа мутахассислари Буюк Британияда малака ошириш имкониятига эга бўлади.