Buxoro viloyati Qorako‘l tumanidagi 1-ixtisoslashtirilgan davlat maktab-internatining o‘quvchilari 2014-2017 o‘quv yillari davomida Yaponiya, Hindiston, Rossiya, Tailand va boshqa davlatlarda o‘tkazilgan xalqaro va jahon fan olimpiadalarida ishtirok etgan. Turon24 muxbiri mazkur ta’lim maskanidagi sharoitlarni o‘rgandi.

Aniqlanishicha, O‘zbekistonga 20 ga yaqin chempionni yetkazib bergan maktab-internatda ta’lim olish, turli mashg‘ulotlar bilan shug‘allanish uchun imkoniyat yetarli emas, sharoit davr talablariga mutlaqo javob bermaydi. Hozir o‘quv binosining ichki va tashqi devorlari nurab bormoqda. Sport zali hamda majlis zali yo‘q. Sport maydoni nochor va ta’mirga muhtoj, hojatxonalar ayanchli ahvolda.

368 o‘quvchi tahsil oladigan maktab-internat yotoqxonasi 50 o‘ringa mo‘ljallangan. Biroq undan 110 o‘quvchi foydalanadi. 3 ta sinf xonasi ham qo‘shimcha yotoqxona sifatida moslashtirilgan. 160 dan ortiq o‘quvchi esa uyga qatnab va hududga yaqin uylarda ijarada turib tahsil oladi.

Ma’lumot uchun: Qorako‘ldagi ushbu maktab-internatga o‘quvchilar tanlov asosida qabul qilinadi. Unda 47 nafar oliy toifali o‘qituvchi va 10 nafar xalq ta’limi a’lochisi saboq beradi. Ichki tartib-intizom qoidalariga qat’iy amal qilinadi. Joriy o‘quv yilida 30 o‘ringa 500 dan ortiq bola da’vogarlik qilgan.