O‘zbekiston Respublikasi Prezidenti Shavkat Mirziyoyev 12 yoshida jahonning amaldagi eng yosh xalqaro grossmeysteriga aylangan Javohir Sindarovga maktub yo‘lladi.

Mirziyoyev imzosi tushirilgan maktubda Sindarov shaxmat olamidagi eng oliy maqom — xalqaro grossmeyster unvoniga sazovor bo‘lgani bilan tabriklangan.

“O‘zbekiston mamlakatining sendek 12 yashar navqiron, azm-u shijoatli farzandi g‘oyat murosasiz ruhda o‘tgan saralash bahslarida muvaffaqiyat qozonib, jahonning amaldagi eng yosh grossmeysteri darajasiga ko‘tarilgani, dunyo shaxmati tarixidagi bu yuksak natija, hech shubhasiz, barchamizga, butun O‘zbekiston xalqiga katta g‘urur va iftixor bag‘ishlaydi”, deyilgan maktubda.

Shavkat Mirziyoyev shuningdek, maktubida bunday natija boshqa ming-minglab yosh o‘g‘il-qizlarning katta g‘alabalarni qo‘lga kiritishi uchun ruhlantirishini ham alohida ta’kidlagan.

“Fursatdan foydalanib, O‘zbekiston iftixori bo‘lgan sendek zukko farzandni tarbiyalab, voyaga yetkazgan ota-onangga, barcha oila a’zolaringga, ustoz va murabbiylaringga o‘z nomimdan, xalqimiz nomidan chuqur minnatdorlik bildiraman. Senga baxt va omad, baland parvozlar hamda yangi-yangi g‘alabalar doimo hamroh bo‘lishini tilayman”, deya tugatilgan maktub.

Avvalroq, unga Toshkent shahar hokimligi tomonidan uch xonali uy taqdim etilgandi.