O‘zingizga ma’lum, Qarshining “Sevinch” futbol klubi o‘z tarixida to‘qqiz karra O‘zbekiston Kubogini qo‘lga kiritgan.

Jamoa bu yil ham kubok bahslarini ko‘tarinki ruhda o‘tkazmoqda. Bugun “Sevinch” o‘z maydonida, O‘zbekiston Kubogi ¼ finali javob uchrashuvida Farg‘onaning “Neftchi W” jamoasini qabul qiladi. Dastlabki uchrashuvda 6:0 hisobida zafar quchib, yarim final masalasini deyarli hal qilishgan edi.

Bugun bo‘ladigan uchrashuv oldidan jamoa sardori va klubimiz yutuqlariga o‘zining katta hissasini qo‘shgan tajribali himoyachimiz Oliya Axmedovadan fikrlarini so‘radik.

-Bu yilgi maqsadimiz o‘ninchi marta O‘zbekiston Kuboigini qo‘lga kiritish, shuningdek yana bir marta chempion bo‘lish. Jamomiz shu maqsadda harakat qilayapti. Bugun bo‘ladigan uchrashuvga ham yaxshi tayyorgarlik ko‘rdik. Mamlakatimizning U-19 terma jamoasiga jalb etilgan futbolchilarimiz ham safimizga qo‘shilishdi.

Hammaning kayfiyati a’lo darajada. Faqat ob-havoni noqulayligini hisobga olmasak, hammasi ko‘ngildagidek. To‘g‘ri,  “Neftchi W” jamoasi bilan chorak finalning safarda bo‘lgan dastlabki uchrashuvida  yirik 6:0 hisobida g‘alaba qozondik, bu “Sevinch”ning deyarli yarim finaldaligini bildiradi. Ammo biz bunga e’tibor qilmagan holda bugun maydonga tushamiz.

O‘zingizga ma’lum, yarim finaldagi juftliklar qur’aga ko‘ra ma’lum bo‘ladi. Aslida raqibimizning kim bo‘lishi biz uchun farqi yo‘q. Takror aytaman, bu yil o‘z oldimizga katta maqsad qo‘yganmiz. Shunga erishish uchun bor kuch va mahoratimizni ishga solamiz, – deydi Oliya Axmedova.