Bugun Pepsi Cuperliganing 28-tur uchrashuvlari boshlanadi. O‘zPFL bugungi sanaga 3 ta bahsni belgilagan. Quyi oltitalikda kurash olib borayotgan “Qizilqum” hamda “So‘g‘diyona” Navoiyda o‘zaro raqobat olib borishadi. Andrey Fyodorov ustozligidagi “temiryo‘lchilar” esa Toshkentda “Metallurg” bilan uch ochko uchun kurashga kirishadilar.
Nihoyat, Farg‘onadagi “Istiqlol” markaziy o‘yingohida Bahrom Haydarov bosh murabbiyligidagi “Neftchi” futbolchilari O‘zbekiston Kubogi-2018ning amaldagi g‘olibi AGMK vakillarini qabul qilishadi. Qayd etish kerakki, farg‘onaliklar “Istiqlol”da kechayotgan oxirgi bellashuvlarda ancha muvaffaqiyatli to‘p surib, raqiblarni yirik natijalar bilan dog‘da qoldirishmoqda. AGMK uchun ham Farg‘onaning bosh arenasi omadli keldi. Joriy mavsum AGMK ishtirokidagi “Istiqlol” stadionidagi bahslarda Baxtiyor Ashurmatov jamoasi g‘alabalarni naqd qilishmoqda. Avvaliga olmaliqliklar chempionat doirasida “Neftchi”dan ustun kelishgan bo‘lsa, 28 oktyabr kuni “Paxtakor” taslim etildi.
Umuman olganda, “Istiqlol” stadionida ketma-ket zafarlari o‘yinlarni o‘tkazayotan “Neftchi” hamda AGMK jamoalarining bugungi o‘yinlariga bo‘lgan qiziqish yuqori deyish mumkin.
Ayni paytda Farg‘onada yomg‘irli ob-havo xukmronlik qilmoqda. Biroq futbolga chanqoq muxlisga stadionga kelishi uchun xar qanday ob-havo sharoiti to‘sqinlik qila olmaydi. Shunday ekan, bugun ham farg‘onalik jonkuyar ishqibozlarni stadionga chorlab qolgan bo‘lar edik. Zero, mavsumning muhim bellashuvlaridan birida “Neftchi” jamoasi uchun muxlislarning daldasi o‘ta muhim hisoblanadi.
28-turning hamma o‘yinlari bir xil vaqtga 18:00ga belgilangan.
Barcha ishqibozlarni stadionga chorlaymiz! Olg‘a “Neftchi”!
“Neftchi” matbuot xizmati
