Xabar berib o‘tganimizdek, Turkmaniston poytaxti Ashxobod shahrida og‘ir atletika bo‘yicha jahon chempionati start oldi. Avvalroq, O‘zbekiston terma jamoasining musobaqada ishtirok etayotgan tarkibini ma’lum qilgandik.

Bugun polvonlarimiz jahon birinchiligidagi ishtiroklarini boshladilar. Yaqindagina o‘smirlar Olimpiya o‘yinlarida kumush medalni qo‘lga kiritgan Muhammadqodir Toshtemirov kattalar o‘rtasidagi jahon chempionatida chiqish qildi. Hamyurtimiz -73 kg vazn toifasida «S» guruhidagi bahslarda ishtirok etdi va yettinchi natijani ko‘rsatdi. Qayd etish lozimki, Muhammadqodir S guruhida bahslarga kirishgan 13 nafar atlet ichida yoshi eng kichik sportchi edi. Ammo, shunga qaramay u o‘zidan yoshi katta bo‘lgan polvonlardan ham yaxshiroq natija ko‘rsata oldi. Umid qilamizki, o‘smirlar Olimpiadasi sovrindori hisoblangan Muhammadqodir uchun bu hali boshlanishi. Uning zafarli yurishlari hali oldinda.

Bugun shuningdek, Adhamjon Ergashev va Muattar Nabiyevalar A guruhida g‘oliblik uchun supachaga chiqadilar.

E’tiboringizga o‘zbekistonlik sportchilarning jahon chempionatidagi ishtiroklari taqvimini havola qilamiz:

-73 kg: Muhammadqodir Toshtemirov (S guruhi, 3 noyabr)

-61 kg: Adhamjon Ergashev (A guruhi, 3 noyabr)

-67 kg: Doston Yoqubov (A guruhi, 4 noyabr)

-89 kg: Zaynobiddin Mahamadaminov (S guruhi, 6 noyabr)

-89 kg: Sunnatilla O‘sarov (B guruhi, 6 noyabr)

-102 kg: Akbar Jo‘rayev (A guruhi, 8 noyabr)

-109 kg: Ruslan Nurutdinov (A guruhi, 9 noyabr)

+109 kg: Rustam Djangabayev (A guruhi, 10 noyabr)

Qizlar:

-55 kg: Muattar Nabiyeva (A guruhi, 3 noyabr)

-64 kg: Kumushxon Fayzullayeva (B guruhi, 5 noyabr)

-81 kg: Tursunoy Jabborova (A guruhi, 8 noyabr)

-87 kg: Dolera Davronova (B guruhi, 9 noyabr).