Poytaxtimiz yana bir xalqaro musobaqaga mezbonlik qilmoqda. Bugun, 11 noyabr kuni Toshkentdagi «Universal» sport saroyida qilichbozlikning shpaga yo‘nalishi bo‘yicha «Satellit» xalqaro turniri o‘tkazilmoqda.
Bahslarda O‘zbekiston, Qozog‘iston, Qirg‘iziston, Turkmaniston, Tojikiston, Indoneziya, shuningdek, Xalqaro qilichbozlik federasiyasi bayrog‘i ostidagi sportchilar sovrinli o‘rinlar uchun kurash olib bormoqdalar.
Biroz avval musobaqaning tantanali ochilish marosimi o‘tkazildi. Tadbirda O‘zbekiston Milliy olimpiya qo‘mitasi Bosh kotibi Jasur Matchanov, O‘zbekiston Jismoniy tarbiya va sport vaziri o‘rinbosarlari, O‘zbekiston qilichbozlik federasiyasi raisi hamda Toshkent shahar hokimligi mutasaddilari ishtirok etishdi.
Ochilish marosimida MOQ Bosh kotibi Jasur Matchanov so‘zga chiqar ekan, yana bir nufuzli musobaqa O‘zbekistonga ishonib topshirilganini, yurtimiz mazkur turnirni yuqori saviyada o‘tkaza olishini, buning zamirida O‘zbekistonda sportga ko‘rsatilayotgan e’tibor yotganini qayd etib o‘tdi. Tadbir davomida so‘zga chiqqan mutasaddilar ham O‘zbekistonda sport bilan shug‘ullanish uchun juda yaxshi sharoitlar yaratilganligini aytib, turnir ishtirokchilariga muvaffaqiyatlar tilashdi.
O‘zbek estradasi yulduzlarining chiqishlari tadbirga yanada ko‘tarinki kayfiyat bag‘ishladi.
O‘zbekiston Respublikasi davlat madhiyasidan so‘ng, ochilish marosimi nihoyasiga yetdi va asosiy bahslarga start berildi.
