Avvalroq, Toshkent shahrida o‘smir qizlar o‘rtasida qilichbozlikning sablya yo‘nalishi bo‘yicha jahon kubogi musobaqasi boshlangani haqida xabar bergan edik.

Musobaqada jahonning 14 mamlakatidan 53 nafar sportchi ishtirok etmoqda. Kecha “Universal” sport saroyida ushbu turnirning ochilish marosimi bo‘lib o‘tdi.

Ochilish marosimida O‘zbekiston Milliy olimpiya qo‘mitasi prezidenti Umid Ahmadjonov, Jismoniy tarbiya va sport vaziri Dilmurod Nabiyev, Toshkent shahar hokimi Jahongir Ortiqxo‘jayev, O‘zbekiston qilichbozlik federasiyasi raisi Rustam Shoabdurahmonov ham ishtirok etdi.

Tadbirda so‘zga chiqqanlar ushbu musobaqaning qay darajada ahamiyatli ekanligi, ana shunday nufuzli musobaqa O‘zbekistonga ishonib topshirilganidan mamnun ekanliklarini qayd etib o‘tdilar. So‘ng O‘zbekiston Respublikasi davlat madhiyasi yangradi va musobaqa rasman ochiq deb e’lon qilindi.

E’tiboringizga Umid Ahmadjonov, Dilmurod Nabiyev, Jahongir Ortiqxo‘jayev, Rustam Shoabdurahmonov ishtiroki va musobaqadan olingan suratlarni taqdim etamiz.