«Barselona» rahbariyati hujumchi Usmon Dembeleni "bir yoqlik" qilish masalasini ko‘rib chiqmoqda.

Klub direktorlar kengashi bir necha a’zosining fikriga ko‘ra, 20 yoshli futbolchi ulg‘aymayapti. Natijada fransiyalik o‘yinchining yuqori saviyaga ko‘tarilishiga nisbatan shubhalar paydo bo‘ldi. «Barselona» bir necha marta Usmonga ortiqcha narsalar bilan chalg‘imasdan, 24 soat davomida futbol bilan yashash kerakligini tushuntirishga urindi. Futbolchiga berilgan so‘nggi imkoniyat shunday bo‘ldi: agar Dembele o‘z ishiga bo‘lgan munosabatni o‘zgartirmasa, «Barselona»da o‘ynash nima ekanini tushunib yetmasa, u hech qachon top-futbolchiga aylanmaydi. Boz ustiga, o‘yinchini o‘zgartirish uchun klub tomonidan bo‘layotgan harakatlarga Usmon yetarli e’tibor qaratmayapti.

Dembele qorni og‘rib qolganini bahona qilib mashg‘ulotga kelmagani bosh murabbiy Ernesto Valverdening g‘azabini qo‘zg‘atdi. Mutaxassis "Betis"ga qarshi o‘yinda futbolchini qaydnomaga kiritmadi. Fransiyalik o‘yinchi keyingi bahslarda ham maydondan tashqarida qolishi mumkin.

«Barselona» shu paytgacha Usmonning qiliqlarini uning yoshligiga yo‘yib kelayotgandi. Ammo endi Valverde unga nisbatan qattiqqo‘llik qiladi. Dembele o‘zini yana shunday tutsa, klub uni jazolashi mumkin. Jamoa rahbariyati uning iqtidoriga ishonmoqda, ammo futbolchining ishga bo‘lgan munosabati o‘zgarishiga ishonchi komil emas.

«Barselona» yozgi transfer paytida Usmon Dembeleni 100 million yevroga sotib yuborishi mumkin. Qishki transfer paytida u sotuvga qo‘yilmaydi.