«Барселона» раҳбарияти ҳужумчи Усмон Дембелени "бир ёқлик" қилиш масаласини кўриб чиқмоқда.

Клуб директорлар кенгаши бир неча аъзосининг фикрига кўра, 20 ёшли футболчи улғаймаяпти. Натижада франциялик ўйинчининг юқори савияга кўтарилишига нисбатан шубҳалар пайдо бўлди. «Барселона» бир неча марта Усмонга ортиқча нарсалар билан чалғимасдан, 24 соат давомида футбол билан яшаш кераклигини тушунтиришга уринди. Футболчига берилган сўнгги имконият шундай бўлди: агар Дембеле ўз ишига бўлган муносабатни ўзгартирмаса, «Барселона»да ўйнаш нима эканини тушуниб етмаса, у ҳеч қачон топ-футболчига айланмайди. Боз устига, ўйинчини ўзгартириш учун клуб томонидан бўлаётган ҳаракатларга Усмон етарли эътибор қаратмаяпти.

Дембеле қорни оғриб қолганини баҳона қилиб машғулотга келмагани бош мураббий Эрнесто Вальверденинг ғазабини қўзғатди. Мутахассис "Бетис"га қарши ўйинда футболчини қайдномага киритмади. Франциялик ўйинчи кейинги баҳсларда ҳам майдондан ташқарида қолиши мумкин.

«Барселона» шу пайтгача Усмоннинг қилиқларини унинг ёшлигига йўйиб келаётганди. Аммо энди Вальверде унга нисбатан қаттиққўллик қилади. Дембеле ўзини яна шундай тутса, клуб уни жазолаши мумкин. Жамоа раҳбарияти унинг иқтидорига ишонмоқда, аммо футболчининг ишга бўлган муносабати ўзгаришига ишончи комил эмас.

«Барселона» ёзги трансфер пайтида Усмон Дембелени 100 миллион еврога сотиб юбориши мумкин. Қишки трансфер пайтида у сотувга қўйилмайди.