25 noyabr kuni Pepsi Superliga 31-turi doirasida Buxoroning “Buxoro” klubi o‘z maydonida Namanganning “Navbahor” jamoasini qabul qiladi.
Mazkur klublar Superliga (oliy liga) o‘yinlarida 53 marta bir-birlariga qarshi maydonga tushishgan. Ushbu 53 bahsdan 29tasida jamoamiz g‘olib chiqqan bo‘lsa, 16ta uchrashuvda buxoroliklar g‘alaba qozonishgan, 8ta o‘yinda esa tomonlar durangga imzo chekishgan.
“Navbahor” shu kunga qadar o‘zaro o‘yinlarda 98ta to‘p kiritib, o‘z darvozasidan 60 marta to‘p olib chiqqan. Mazkur jamoalarning o‘zaro bahslarida namanganliklar 95 ochkoni, “Buxoro” esa 56 ochkoni qo‘lga kiritgan.
O‘zaro uchrashuvlardagi eng yirik hisob 2001 yili kuzatilgan. O‘sha yili Namanganda o‘tkazilgan o‘yinda “lochinlar” 6:1 hisobida g‘alaba qozonishgan. Buxoroliklar esa 2009 yilgi mavsumda jamoamizni 3:0 hisobida mag‘lubiyatga uchratishgan.
Joriy mavsumdagi uchrashuvlarga to‘xtaladigan bo‘lsak, bu yilgi barcha bahslarda jamoamiz zafar quchgan. Jumladan, birinchi bosqich doirasidan o‘rin olgan o‘yinlarda Buxoroda Mirzohid G‘ofurovning goli evaziga 1:0, Namangandagi bahsda esa Jahongir Mehmonov va Darko Nikachning gollari hisobiga 2:0, ikkinchi bosqich doirasidagi Namanganda bo‘lib o‘tgan bahsda Azizbek Turg‘unboyev tomonidan kiritilgan to‘p evaziga 1:0 hisobida “lochinlar” g‘alaba qozonishgan.
“Navbahor” Buxoroda o‘tkazilgan so‘nggi 5 uchrashuvda faqat 1 marta mag‘lubiyatga uchragan, xolos. 3ta bahsda “lochinlar” zafar quchishgan bo‘lsa, yana 1ta o‘yinda durang hisobi qayd etilgan.
Buxoroda bo‘lib o‘tgan so‘nggi besh uchrashuv:
2014 yil - “Buxoro”- “Navbahor “ - 0:2
2015 yil - “Buxoro” – “Navbahor” - 0:1
2016 yil - “Buxoro” - “Navbahor” - 3:2
2017 yil - “Buxoro” – “Navbahor” - 3:3
2018 yil - “Buxoro” - “Navbahor” - 0:1
O‘zaro o‘yinlar haqida fakt: Buxoroda bo‘lib o‘tgan 26ta o‘yinning 12tasida mezbonlar, 9tasida mehmonlar g‘olib bo‘lishgan. 5ta uchrashuvda esa tomonlar murosa ko‘chasini tanlashgan.
Bo‘lajak uchrashuvda ham sevimli jamoamizga omad yor bo‘lib, Buxorodan yana g‘alaba bilan qaytishiga tilakdoshmiz.
“Navbahor” PFK matbuot xizmati.
