Avvalroq, Osiyo chempioni, Osiyo o‘yinlari g‘olibi Isroil Madrimov professional ringdagi debyut jangini o‘tkazgani va unda meksikalik Vladimir Ernandesga qarshi ringga chiqib, 10 raundga mo‘ljallangan jangning oltinchi raundida ketma-ket zarbalari evaziga raqibini nokautga uchratgani haqida xabar bergan edik.
Isroil Madrimov jangdan so‘ng Instagram’dagi sahifasida o‘z fikrlarini videotasvir orqali yozib qoldirdi.
Videoni Instagram’da ko‘rish uchun bu yerga bosing!
“Assalomu alaykum, aziz Vatandoshlar mana professional boksdagi birinchi jangimni ham g‘alaba bilan boshladim. Bu g‘alabam xalqimni, Prezidentimni yutug‘i. Chunki sizlar meni har doim qo‘llab-quvvatlab turishdan charchamayapsizlar.
Shunga yarasha biz ham sizlarning ishonchingizni oqlagan holda yana shunday yorqin g‘alabalar bilan faoliyatni davom ettiramiz. Bu kabi imkoniyatlarni yaratib bergan O‘zbekiston boks federasiyasiga minnatdorlik bildiraman.
Bunday tajribalar bizga nasib qilsa, 2019 yil Osiyo chempionati, jahon chempionati va Olimpiada-2020 o‘yinlari lisenziyasi uchun albatta, yordam beradi.
Albatta, olimpiada o‘yinlarida ham mana shunday g‘alabalar bilan sizlarni xursand qilishga harakat qilaman. Olg‘a O‘zbekiston”, deya yozib qoldirgan Isroil Madrimov.
Ma’lumot o‘rnida, Isroil ushbu g‘alaba orqali debyut jangidayoq WBA Intercontinental kamariga ega chiqdi.
