O‘zbekistonlik professional bokschi, Murodjon Ahmadaliyev professional boksdagi beshinchi jangida ringga ko‘tarilib, amerikalik Isaak Zarateni o‘n raundga mo‘ljallangan jangning to‘qqizinchi raundida nokautga uchratdi.

Ushbu g‘alabadan so‘ng hamyurtimiz ijtimoiy tarmoqlardagi sahifasida videomurojaat yo‘llab, dadasini tug‘ilgan kuni bilan tabrikladi va g‘alabani kimga bag‘ishlaganini aytib o‘tdi.

Videoni Instagram’da ko‘rish uchun bu yerga bosing.

“Assalomu aleykum, hurmatli yurtdoshlar! Mana bugun chempionlik kamarimni himoya qildim. Hammalaringizga katta rahmat, qo‘llab-quvvatlab turganlarigiz uchun, duolarigiz uchun o‘z minnatdorchiligimni bildiraman.

Sizlarning duolaringiz, ishonchlaringiz menga judayam dalda va kuch bo‘ldi. Shunday shart-sharoitlar yaratib berganlari uchun O‘zbekiston boks federasiyasiga o‘z minnatdorligimni bildiraman.

Bunday sharoitdan unumli foydalanib, Osiyo, jahon olimpiada o‘yinlarida O‘zbekistonimiz bayrog‘ini yanada baland ko‘taramiz. Chempionlik kamari faqat siz uchun. Bunday g‘alabalardan hali ko‘p bo‘ladi. Bayrog‘imizni balandlarga ko‘tarib, O‘ZBEKISTONimni butun dunyoga tanitaman.

Bugun dadamning tug‘ilgan kunlari. Sizni tug‘ilgan kuningiz bilan chin qalbimdan tabriklayman. Umringiz uzoq bo‘lsin bizni baxtimizga sog‘-salomat bo‘ling dadajonim. G‘alabamni butun ona yurtim, ota-onam va Prezidentimga bag‘ishlayman. Hammaga yana bir marta katta rahmat!”, deya yozgan Ahmadaliyev.

Ma’lumot uchun, Ahmadaliyev professional faoliyati davomida bugungisi bilan qo‘shib hisoblaganda besh marotaba ringga chiqqan va ularning barchasida g‘alaba qozongan. Janglarining to‘rttasini u nokaut evaziga o‘z foydasiga hal qilgan.

Amerikalik 27 yoshli Zarate esa 23 ta jang o‘tkazib, 16 ta g‘alabaga erishgan. Uchta jangda durang qayd etilgan va yana to‘rtta bahsda mag‘lub bo‘lgan.