«Andijon» professional futbol klubi tasarrufidagi «Viloyat bolalar va o‘smirlar futbol maktabi»da bugun navbatdan tashqari yig‘ilish bo‘lib o‘tdi.

Yig‘ilishni Andijon viloyati hokimligining futbolga biriktirilgan vakili Shavkatbek Nishonov olib bordi. Shuningdek mazkur yig‘ilishda «Andijon» FK bosh direktori Ma’rufjon Abdisalomov, klub texnik-direktori Orif Mamatkazin hamda «Viloyat bolalar va o‘smirlar futbol maktabi»ning murabbiylari va yana bir qator ishchi xodimlari ishtirok etdi.

Yig‘ilishdan ko‘zlangan maqsad - «Andijon»  klubi qoshidagi futbol maktabining rahbari o‘zgarganini rasman keng ommaga e’lon qilish edi. Bungacha ushbu maskanga direktorlik qilib kelgan Bekzodbek Karimov o‘z arizasiga binoan egallab turgan lavozimidan ketdi. Endilikda esa «Viloyat bolalar va o‘smirlar futbol maktabiga» Farruh Mirzayev rahbarlik qiladigan bo‘ldi. Ma’lumot uchun, Farruh Ziyoitdinovich 1990 yil Andijon viloyatining Paxtaobod tumanida tavallud topgan. Ma’lumoti oliy. Andijon davlat universitetining jismoniy tarbiya fakultetini tamomlagan. 2007-2017 yillar davomida oliy va birinchi liga jamoalarida futbolchi sifatida faoliyat yuritgan. Bungacha Andijon viloyat futbol federasiyasida bolalar futbolini rivojlantirish bo‘limida mutaxassis sifatida ishlab kelayotgandi.

Bugundan rasman Farruh Mirzayev «Viloyat bolalar va o‘smirlar futbol maktabi»ning rahbari sifatida faoliyatini boshladi.

«Andijon» matbuot xizmati.