«Андижон» профессионал футбол клуби тасарруфидаги «Вилоят болалар ва ўсмирлар футбол мактаби»да бугун навбатдан ташқари йиғилиш бўлиб ўтди.

Йиғилишни Андижон вилояти ҳокимлигининг футболга бириктирилган вакили Шавкатбек Нишонов олиб борди. Шунингдек мазкур йиғилишда «Андижон» ФК бош директори Маъруфжон Абдисаломов, клуб техник-директори Ориф Маматказин ҳамда «Вилоят болалар ва ўсмирлар футбол мактаби»нинг мураббийлари ва яна бир қатор ишчи ходимлари иштирок этди.

Йиғилишдан кўзланган мақсад - «Андижон»  клуби қошидаги футбол мактабининг раҳбари ўзгарганини расман кенг оммага эълон қилиш эди. Бунгача ушбу масканга директорлик қилиб келган Бекзодбек Каримов ўз аризасига биноан эгаллаб турган лавозимидан кетди. Эндиликда эса «Вилоят болалар ва ўсмирлар футбол мактабига» Фарруҳ Мирзаев раҳбарлик қиладиган бўлди. Маълумот учун, Фарруҳ Зиёитдинович 1990 йил Андижон вилоятининг Пахтаобод туманида таваллуд топган. Маълумоти олий. Андижон давлат университетининг жисмоний тарбия факултетини тамомлаган. 2007-2017 йиллар давомида олий ва биринчи лига жамоаларида футболчи сифатида фаолият юритган. Бунгача Андижон вилоят футбол федерациясида болалар футболини ривожлантириш бўлимида мутахассис сифатида ишлаб келаётганди.

Бугундан расман Фарруҳ Мирзаев «Вилоят болалар ва ўсмирлар футбол мактаби»нинг раҳбари сифатида фаолиятини бошлади.

«Андижон» матбуот хизмати.