Fransiyada shu oy boshida dunyoga kelgan chaqaloqqa Grizmann Mbappe deb ism qo‘yildi. Ammo ota-ona bunday tanlovi bilan mamlakat qonunlarini buzganlikda gumonlanmoqda.
La Montagne`ning yozishicha, Briv shahrining ayni masaladagi rasmiy mulozimi bolaga bunday ism qo‘yish «uning manfaatlariga zid yoki uchinchi tomonning familiyasini himoya qilish borasidagi huquqlariga daxl qilmoqda», deb hisoblayapti.
Shahar meri ushbu masala bilan prokuratura shug‘ullanayotganini ma’lum qilgan. Prokuror, agar lozim topsa, ota-onadan tanlangan ismni o‘zgartirishni so‘raydi. Ular buni rad etishsa, bolaga sud tomonidan ism qo‘yilishi mumkin.
Ma’lumot uchun, Fransiyada 25 yil oldin kuchga kirgan qonun farzandga ism tanlash erkinligini kafolatlash bilan birga, bolalarni ularning manfaatiga qarshi ism qo‘yilishidan himoya qiladi. 1993 yilga qadar mamlakat Fuqarolik kodeksiga binoan chaqaloqni faqatgina muayyan ismlar bilangina atash mumkin edi.
Eslatib o‘tamiz, Antuan Grizmann va Kilian Mbappe Fransiya terma jamoasining asosiy hujumchilari sanalishadi. «Atletiko» va «PSJ» vakillari «uchranglilar»ning JCH-2018 g‘olibi bo‘lishiga katta hissa qo‘shishganidan so‘ng o‘z vatanlarida ulkan obro‘ qozonishdi.
