Avstriyalik markaziy himoyachi David Alaba joriy mavsum yakunida Madridning "Real" klubini tark etadi. Bu haqdagi ma’lumot "qaymoqranglilar"ning rasmiy saytida e’lon qilindi.
Alaba Madrid klubi safiga 2021 yilda, Myunxenning "Bavariya" jamoasi bilan shartnomasi yakunlanganidan so‘ng erkin agent sifatida kelib qo‘shilgan edi. "Real" tarkibida 33 yoshli himoyachi 131 ta o‘yin o‘tkazib, o‘z hisobiga 5 ta gol va 9 ta golli uzatmani yozdirib qo‘ydi.
"Qirollik" klubi libosida Alaba ikki marta Chempionlar ligasi g‘olibi bo‘ldi, shuningdek, ikki bor La Liga chempionligini qo‘lga kiritdi. Ispaniya chempionati yakunlanishiga bir tur qolganda, "Real" 83 ochko bilan turnir jadvalida ikkinchi o‘rinni egallab turibdi.
