Францияда шу ой бошида дунёга келган чақалоққа Гризманн Мбаппе деб исм қўйилди. Аммо ота-она бундай танлови билан мамлакат қонунларини бузганликда гумонланмоқда.
La Montagne`нинг ёзишича, Брив шаҳрининг айни масаладаги расмий мулозими болага бундай исм қўйиш «унинг манфаатларига зид ёки учинчи томоннинг фамилиясини ҳимоя қилиш борасидаги ҳуқуқларига дахл қилмоқда», деб ҳисоблаяпти.
Шаҳар мэри ушбу масала билан прокуратура шуғулланаётганини маълум қилган. Прокурор, агар лозим топса, ота-онадан танланган исмни ўзгартиришни сўрайди. Улар буни рад этишса, болага суд томонидан исм қўйилиши мумкин.
Маълумот учун, Францияда 25 йил олдин кучга кирган қонун фарзандга исм танлаш эркинлигини кафолатлаш билан бирга, болаларни уларнинг манфаатига қарши исм қўйилишидан ҳимоя қилади. 1993 йилга қадар мамлакат Фуқаролик кодексига биноан чақалоқни фақатгина муайян исмлар билангина аташ мумкин эди.
Эслатиб ўтамиз, Антуан Гризманн ва Килиан Мбаппе Франция терма жамоасининг асосий ҳужумчилари саналишади. «Атлетико» ва «ПСЖ» вакиллари «учранглилар»нинг ЖЧ-2018 ғолиби бўлишига катта ҳисса қўшишганидан сўнг ўз ватанларида улкан обрў қозонишди.