Superliga 32-turi doirasida O‘zbekistonning 3 karra chempioni – Toshkentning “Lokomotiv” jamoasi “Navbahor” mehmoni bo‘ladi. O‘yin soat 16:00da start oladi.
Shu o‘rinda ushbu ikki jamoaning o‘zaro uchrashuvlari tarixiga e’tibor qaratadigan bo‘lsak, “Lokomotiv” shu paytga qadar “Navbahor”ga qarshi 29ta bahs o‘tkazgan. O‘zaro o‘yinlarda katta ustunlik “temiryo‘lchilar” tomonida. “Lokomotiv” ushbu jamoani umumiy 16 marta mag‘lub etgan. “Navbahor” “Loko”ni 8 marta dog‘da qoldirgan bo‘lsa, qolgan 5 o‘yin durang bilan yakun topgan.
“Loko” futbolchilari ushbu raqib darvozasini hozirgacha 51 marta ishg‘ol etishga muvaffaq bo‘lishgan. Darvozadan esa 39 bor to‘p o‘tkazib yuborgan.
“Lokomotiv”ning “Navbahor” ustidan qozongan eng yirik hisobdagi g‘alabasi 2016 yilgi mavsumning ikkinchi davrasida qayd etilgandi – 5:0.
Bu mavsumda “Lokomotiv” mezbonligida kechgan bahslar 2:0 va 3:1 hisobida yakunlangandi. “Navbahor” maydonida o‘tgan o‘yin mezbonlarning 2:0 hisobidagi g‘alabasi bilan yakunlangan.
