O‘zbek futbolining qirolichalaridan biri bo‘lgan Dildora Xolboyeva kelgusi faoliyatini PRO-Liga g‘olibi «Andijon» jamoasida davom ettirishi mumkin.

2016 yildan buyon Jizzaxning «So‘g‘diyona» klubi matbuot xizmatini boshqarib kelayotgan Xolboyeva so‘nggi uch yil davomida klub faoliyatini ijtimoiy tarmoqda avvalgi yillarga nisbatan ajoyib tarzda yoritdi deyish mumkin.

 «So‘g‘diyona» klubini ijtimoiy tarmoqlarning har birida o‘z akkaunti borligi va muhimi faol tarzda ishlab turishi fikrimizni tasdiqlaydi.

Aftidan Xolboyeva yaqin orada jamoasi bilan xayrlashishi kutilmoqda. Chunki hozirda Dildoraga Superliganing bir qator jamoalaridan taklif bo‘lmoqda. Ijtimoiy tarmoqlarda ancha faol bo‘lgan Xolboyeva bundan biroz avval instagramdagi sahifasiga «Andijon» logotipini qo‘yib, ushbu jamoadan jiddiy taklif bo‘layotgani va bu haqda o‘ylab ko‘rish uchun biroz oz muddat vaqt so‘raganini ham ma’lum qildi.

Agarda tomonlar o‘zaro kelishib qolsa, Dildora Xolboyeva mavsum-2019 da «Andijon» FK matbuot xizmatida faoliyatini boshlaydi.

Kezi kelganda shuni aytib o‘tish joizki, Dildora Xolboyeva oliy ma’lumotli, rus va ingliz tilini mukammal biladi hamda futbol klub matbuot kotibasi sifatida yetarlicha tajribaga egadir.