Ўзбек футболининг қироличаларидан бири бўлган Дилдора Холбоева келгуси фаолиятини ПРО-Лига ғолиби «Андижон» жамоасида давом эттириши мумкин.
2016 йилдан буён Жиззахнинг «Сўғдиёна» клуби матбуот хизматини бошқариб келаётган Холбоева сўнгги уч йил давомида клуб фаолиятини ижтимоий тармоқда аввалги йилларга нисбатан ажойиб тарзда ёритди дейиш мумкин.
«Сўғдиёна» клубини ижтимоий тармоқларнинг ҳар бирида ўз аккаунти борлиги ва муҳими фаол тарзда ишлаб туриши фикримизни тасдиқлайди.
Афтидан Холбоева яқин орада жамоаси билан хайрлашиши кутилмоқда. Чунки ҳозирда Дилдорага Суперлиганинг бир қатор жамоаларидан таклиф бўлмоқда. Ижтимоий тармоқларда анча фаол бўлган Холбоева бундан бироз аввал инстаграмдаги саҳифасига «Андижон» логотипини қўйиб, ушбу жамоадан жиддий таклиф бўлаётгани ва бу ҳақда ўйлаб кўриш учун бироз оз муддат вақт сўраганини ҳам маълум қилди.
Агарда томонлар ўзаро келишиб қолса, Дилдора Холбоева мавсум-2019 да «Андижон» ФК матбуот хизматида фаолиятини бошлайди.
Кези келганда шуни айтиб ўтиш жоизки, Дилдора Холбоева олий маълумотли, рус ва инглиз тилини мукаммал билади ҳамда футбол клуб матбуот котибаси сифатида етарлича тажрибага эгадир.
