2018 yil "Paxtakor"ning uy o‘yinlariga ishqibozlar tashrifi sezilarli darajada o‘sdi.
O‘tgan mavsum "Paxtakor" stadionida bo‘lib o‘tgan 14 uchrashuvga jami 58903 nafar muxlis kelgandi. Bu bir o‘yinga o‘rtacha 4207 nafardan to‘g‘ri kelgandi. Eng ko‘p tomoshabin "Paxtakor" - "Olmaliq" uchrashuvida kuzatilib, unda 11067 nafar ishqiboz o‘yinni stadiondan ko‘rgandi.
Bu mavsumdan uchrashuvlar targ‘iboti va klub rahbariyatining muxlislar bilan faol ishlashga e’tibor qaratayotgani natijasida ishqibozlar tashrifi o‘sganini ko‘rish mumkin. Uy bellashuvlariga o‘rtacha 10893 nafardan muxlis to‘g‘ri keldi. Bu avvalgi yilga nisbatan tashrif 258 (2,58 baravar) foizga o‘sganini ko‘rsatadi. Jami 174 293 nafar muxlis "Paxtakor"ning uydagi o‘yinlarini stadiondan kuzatib borgan. Eng ko‘p ishqiboz 25 may kuni bo‘lib o‘tgan "Paxtakor" - "Bunyodkor" bahsida kuzatilgan - 23456 nafar.
Superligada muxlislar to‘plash borasida "Paxtakor" "Navbahor" va "Buxoro"dan keyin uchinchi pog‘onani egalladi.
"Paxtakor" futbol klubi bundan keyin ham uchrashuvlar oldidan turli ko‘ngilochar dasturlarni tashkil etish, yutuqli o‘yinlar o‘tkazish, ishqibozlarga stadionda o‘zlarini qulay his qilishlari uchun barcha sharoitlarni yaxshilash ustida ishlashda davom etadi.
