“Buxoro” futbol klubi matbuot xizmati jamoaga yangi bosh murabbiy sifatida Shuhrat Fayziyev olib kelinayotgani borasida xabar e’lon qildi. Professional futbol ligasi shuni rasman ma’lum qiladiki, “Buxoro” futbol klubi mazkur mutaxassisni bosh murabbiy sifatida Superliga o‘yinlari uchun ro‘yxatdan o‘tkaza olmaydi.

Futbol klublari o‘tgan oyning so‘nggi o‘n kunligida 2019 yilgi mavsum uchun lisenziyalash talablarini qo‘lga kiritgandi. Shuningdek, lisenziyalash talabi jamoatchilik uchun ham ochiqlandi. Unda 2019 yilgi mavsumdan boshlab Superliga klublari bosh murabbiylarida “Pro” lisenziyasi bo‘lishi shart ekani ko‘rsatib qo‘yilgandi. Shuhrat Fayziyev esa faqatgina “A” lisenziyasining egasi hisoblanadi.

Superligada faoliyatini davom ettirish istagida bo‘lgan mutaxassislar ayni kunlarda Toshkentda bo‘lib turibdi va ular “Pro” lisenziyasi uchun kurslarda ishtirok etyapti. Xususan, “Buxoro” futbol klubining endilikdagi sobiq bosh murabbiyi Ulug‘bek Baqoyev ham ular orasida bor. Biroq Shuhrat Fayziyev o‘z malakasini oshirish imkonini beruvchi mazkur kursda o‘qish istagini bildirmagan.

Bundan tashqari, “Buxoro” futbol klubi o‘z zimmasidagi qarzdorliklar masalasini ijobiy hal qilmaguniga qadar, yangi murabbiy va futbolchilar ro‘yxatdan o‘tkazilmaydi. Bu boradagi rasmiy ogohlantirish xati klubga yetkaziladi. Shuningdek, klub vakillari futbol akademiyasi hamda stadion maysasi haqida ham qayg‘urishi shart.   

Ma’lumot uchun, avvalroq Jizzaxning “So‘g‘diyona” klubi ham shunga o‘xshash ogohlantirish xati qabul qilib olgandi.