Bugun O‘zbekiston zamonaviy beshkurash federasiyasi va Qozog‘iston beshkurash federasiyasi o‘rtasida ikki tomonlama hamkorlik to‘g‘risidagi memorandum imzolandi.

O‘zbekiston zamonaviy beshkurash federasiyasi 2017 yilning fevral oyida tashkil qilingan bo‘lib, unda sportchilar ot sporti, qilichbozlik, o‘q otish, yugurish va suzish bo‘yicha bellashadi.

Mazkur hamkorlik doirasida ikki mamlakat sportchilarining malakasini oshirish mexanizmlari ishlab chiqilgan bo‘lib, nafaqat sportchilar, balki murabbiylar ham o‘zaro tajriba almashish imkoniyatiga ega bo‘lishadi.

– Federasiya rahbari sifatida o‘zimning ilk oltmish kunlik ish rejamni ishlab chiqqanman, – deydi O‘zbekiston zamonaviy beshkurash federasiyasi raisi Bahromjon Gazziyev. – Biz kelgusi yilda mazkur sport turini mamlakatimizda yanada ommalashtirish maqsadida Qatar va Qozog‘iston beshkurash federasiyasi bilan o‘zaro hamkorlik bitimini imzoladik. Bu orqali sportchilarimizning malakasi va mahoratini yanada oshirishga harakat qilyapmiz. Asosiy maqsad – Tokio 2020 Olimpiya o‘yinlariga yo‘llanma qo‘lga kiritish va unda munosib ishtirok etish.

Eslatib o‘tamiz, 11 dekabr kuni O‘zbekiston zamonaviy beshkurash federasiyasi va Qatar beshkurash federasiyalari bilan ham hamkorlik to‘g‘risidagi memorandumni imzolagan edi.