Kecha xabar berib o‘tganimizdek, Turkiyadagi o‘quv-mashg‘ulot yig‘inida jarohat olgan Ivan Nagayev kecha instrumental tekshiruvdan o‘tkazildi, deya xabar bermoqda O‘FA Matbuot xizmati.
“Bu tekshiruvlar natijasida birlamchi tashxis o‘z tasdig‘ini topdi. Ya’ni, hujumchiga chap son old mushagining cho‘zilishi (mushak ichki tolalarining kichik yirtilishi bilan) tashxisi qo‘yildi. Nagayev uchun yil oxirigacha davom etadigan o‘quv-mashg‘ulot yig‘ini yakun topdi. Shunga qaramasdan, murabbiylar futbolchini yig‘in guruhida olib qolishga qaror qilgan.
Zarur bo‘lgan davolash muolajalari aynan shu yerning o‘zida tibbiy shtab nazorati ostida amalga oshirilishi ma’qul ko‘rildi. Bu avvalambor ruhan quvvatlov, chunki yil oxirigacha Ivan Nagayev safga qaytadigan bo‘lsa, BAAdagi Osiyo kubogida muhim figuralardan biriga aylanishi mumkin.
Ikkinchidan esa, Nagayev qit’a chempionatidan qolib ketgan taqdirda ham xotirjam davolanib olishi uchun yaxshigina zamin yaratilgan bo‘ladi”, deyiladi O‘FA xabarida.
