Кеча хабар бериб ўтганимиздек, Туркиядаги ўқув-машғулот йиғинида жароҳат олган Иван Нагаев кеча инструментал текширувдан ўтказилди, дея хабар бермоқда ЎФА Матбуот хизмати.
“Бу текширувлар натижасида бирламчи ташхис ўз тасдиғини топди. Яъни, ҳужумчига чап сон олд мушагининг чўзилиши (мушак ички толаларининг кичик йиртилиши билан) ташхиси қўйилди. Нагаев учун йил охиригача давом этадиган ўқув-машғулот йиғини якун топди. Шунга қарамасдан, мураббийлар футболчини йиғин гуруҳида олиб қолишга қарор қилган.
Зарур бўлган даволаш муолажалари айнан шу ернинг ўзида тиббий штаб назорати остида амалга оширилиши маъқул кўрилди. Бу авваламбор руҳан қувватлов, чунки йил охиригача Иван Нагаев сафга қайтадиган бўлса, БААдаги Осиё кубогида муҳим фигуралардан бирига айланиши мумкин.
Иккинчидан эса, Нагаев қитъа чемпионатидан қолиб кетган тақдирда ҳам хотиржам даволаниб олиши учун яхшигина замин яратилган бўлади”, дейилади ЎФА хабарида.
