Shu kunlarda Pokistonning Lahor shahrida chim ustida xokkey bo‘yicha «Hockey Series Open» xalkaro turnirining birinchi bosqich bahslari bo‘lib o‘tmoqda. Musobaqada O‘zbekiston terma jamoasi ham ishtirok etmoqda.

Vakillarimiz turnirda Qozog‘iston, Nepal va Afg‘oniston terma jamoalari bilan bir guruhdan o‘rin olganlar. Yigitlarimiz hozircha guruhda ikkita o‘yin o‘tkazib, ularning har ikkisida ham g‘alaba qozonishdi. Birinchi turda Afg‘oniston terma jamoasi ustidan 11:0 hisobida g‘alaba qozongan xokkeychilarimiz, bugun ikkinchi tur doirasida o‘tkazilgan bahsda Nepalni 6:1 hisobida taslim etishdi. Guruhdagi so‘nggi o‘yin 22 dekabr kuni Qozog‘iston terma jamoasiga qarshi bo‘lib o‘tadi.

Ma’lumot uchun, guruhda birinchi o‘rinni qo‘lga kiritgan terma jamoa 2019 yilda Hindistonda o‘tkaziladigan final bahslariga yo‘l oladi. Turnirning final bosqichida esa Tokio 2020 Olimpiya o‘yinlariga lisenziyalar o‘ynaladi.