Qatar poytaxti Doha shahrida og‘ir atletika bo‘yicha «5th International Qatar Cup» reyting turniri start oldi. Ushbu musobaqada jahonning turli mamlakatlaridan 120 nafarga yaqin sportchi ishtirok etmoqda. Bahslarda o‘zbekistonlik polvonlar ham sovrinli o‘rinlar uchun kurash olib bormoqdalar.

Bugun -67 kg vazn toifasida bahslar tashkil etildi. Ushbu vazn toifasida yurtimiz sharafini ikki nafar sportchi – Adhamjon Ergashev va Doston Yoqubov himoya qildi.

Doston Yoqubov dast ko‘tarish bahslarida 138 kg., siltab ko‘tarishda esa 175 kg., umumiy hisobda 313 kg. natija ko‘rsatdi. Bu orqali Doston dast ko‘tarishda bronza, siltab ko‘tarish va ikkikurash yakunlariga ko‘ra oltin medal sohibiga aylandi.

Adhamjon Ergashev esa dast ko‘tarishda 142 kg., siltab ko‘tarishda 168 kg. toshni o‘ziga bo‘ysundirdi. Umumiy hisobda esa 310 kg. tosh ko‘tardi. Ushbu natija orqali Ergashev dast ko‘tarishda oltin, siltab ko‘tarishda bronza va ikkikurash yakunlariga ko‘ra kumush medal egasiga aylandi.

Qayd etish lozimki, Adhamjon Ergashev dast ko‘tarish va ikkikurash bo‘yicha 20 yoshgacha bo‘lgan atletlar o‘rtasidagi jahon rekordini yangiladi. Ushbu musobaqa orqali sportchilar Tokio 2020 Olimpiadasi uchun reyting ochkolarini jamg‘arib boradilar.