Mirjalol Qosimov «AGMK» bosh murabbiyi etib tayinlandi.

Bu quvonarli holat. Chunki Qosimovda Osiyo chempionlar ligasida o‘ynash borasida yaxshigina tajriba bor. Bir vaqtlar g‘arb mintaqasida ham o‘z so‘zini ayta olgan murabbiyimiz oldida o‘ta muhim vazifa turibdi. Yana bir quvonarli holat shundaki, Qosimov asosan yoshlarga tayanib jamoa tuzadi. Yoshlar esa yaqinlashib kelayotgan JCH saralashida bizga asqotishi aniq (albatta, Kuper ularni terma jamoaga chaqirsa).

AGMKning oldida yaxshigina sinovlar turibdi. Yana bir qiziq holat shundaki, Qosimovning kuchli taktik ekanligini hisobga olsak, AGMKga OCHL guruh bosqichiga chiqishi uchun imkoniyatni oshiradi. Sababi Qosimov jamoasi hal qiluvchi o‘yinni mehmonda o‘ynashini hisobga olsak, mehmonda o‘ynashni yaxshi biladigan Qosimov AGMKga foyda keltira oladi desak, adashmaymiz. Yana bir muhim jihat.

Qosimov legioner tanlashda ham juda mahoratlidir (Shakir Zaugi, Trifunovich, Pishchur — shular jumlasidan). Uning o‘rtamiyona legionerlari ham doim o‘zini oqlagan. AGMK uchun Qosimovninig yana bir plyus tarafi shundaki, Mirjalol jamoa ruhiyatini istalgan vaziyatda ko‘tara oladi va u o‘zbek futbolchilari uchun doimo fenomen inson sifatida gavdalanadi. Qosimovninig o‘zbek futbolida yaxshigina «avtoritet»ga ega ekanligi ham futbolchilarni boshqarishda ortiqcha qiyinchilik tug‘dirmaydi. Xulosa qilib aytadigan bo‘lsak, Qosimovning kelishi AGMK uchun faqat va faqat foyda keltiradi.