Ispaniya La ligasining 17-turi doirasida "Barselona" klubi o‘z maydonida "Selta"ni qabul qilib, ishonchli g‘alabani qo‘lga kiritdi.

Bahsning 10-daqiqasida Alba tomonidan chap qanotdan yetkazilgan uzatmaga Messi 17 metrlardan kuchli zarba berdi. Mehmonlar darvozaboni zarbani qaytardi, ammo to‘pni ushlab qola olmadi. Dembele esa yaqin masofadan hisobni ochdi.

Birinchi bo‘lim tugash arafasida yana o‘sha Albaning uzatmasidan keyin Messi yakkama-yakka vaziyatga chiqib borib, farqni ikkitaga oshirdi.

Ikkinchi bo‘limda maydon egalari yana bir nechta vaziyatlarni yaratishdi, ammo ularni golga aylantirishda futbolchilar oqsashdi.

Shu tariqa, "Barsa" o‘z ochkolarini 37taga yetkazdi va qishki tanaffusga peshqadam sifatida yo‘l oldi.

Ispaniya La ligasi, 17-tur
Barselona – Selta 2:0 (2:0, 0:0)
Gollar: 1:0 – 10 Dembele, 2:0 – 45 Messi.
Barselona – ter Stegen, Pike, Alba, Nelson Semedu, Langle, Rakitich, Buskets (Alenya, 86), Vidal (Artur, 63), Dembele (Koutinyo, 68), Messi, Suares.
Selta – Blanko, Arauxo, Mazan, Malyo, Kostas, Brais Mendes, Yokushlu (Lobotka, 46), Xosabed, Bufal (Sisto, 76), Aspas (Beltran, 52), Maksi Gomes.
Ogohlantirish: Aspas (45).