Toshkent shahrida Milliy olimpiya qo‘mitasi tashabbusi bilan o‘q otish bo‘yicha huquqni muhofaza qiluvchi organlar xodimlari o‘rtasida seleksion musobaqa tashkil qilindi.
Mudofaa vazirligiga qarashli sport klubining o‘q otish majmuasida bo‘lib o‘tgan turnirda 40 nafarga yaqin sportchi sovrinli o‘rinlar uchun kurash olib bordi.
Bahslar davomida o‘zini ko‘rsata olgan harbiy soha vakillari murabbiylar tomonidan saralab olindi. Musobaqa ishtirokchilari kichik kalibrli va pnevmatik qurollarda o‘zlarini sinab ko‘rishdi. Ayollar o‘rtasida 10 metrga pnevmatik to‘pponchadan o‘q otish bo‘yicha bahslarda Larisa Xolmamatova tengsiz bo‘ldi. 25 metrga kichik kalibrli to‘pponchadan o‘tish bo‘yicha ham Larisa Xolmamatovaga teng keladigan raqib topilmadi.
Kichik kalibrli miltiqdan o‘q otish bo‘yicha bellashuvlarda Husniddin Elmurodov g‘oliblikni qo‘lga kiritgan bo‘lsa, 10 metrga pnevmatik miltiqdan o‘q otishda Jahongir Xojiyev raqiblariga qaraganda yaxshiroq natija ko‘rsatdi.
