Angliyada Boxing Day qiziqarli natijalarni taqdim etmoqda. APLning 20-turi doirasida mavsum yetakchisi «Liverpul» o‘z maydonida «Arsenal»ni qabul qilib, yirik hisobda g‘alaba qozondi.

Uchrashuvni esa Emeri shogirdlari faol boshlashdi va 11-daqiqada hisobni ochishdi: Ensli Meytlend-Naylz aniq uzatmani darvozaga burib qo‘ydi. Mersisaydliklar tezda o‘zlariga kelib, nafaqat hisobni tenglashtirishdi, balki 2 daqiqa ichida Firminoning dubli evaziga hisobda oldinga olib chiqishdi.

Tanaffusga qadar Sadyo Mane va Muhammad Saloh o‘z hisoblariga bittadan gol yozgan bo‘lsalar, Firmino ikkinchi taymda penaltidan hisobni 5:1 ko‘rinishiga keltirdi. Braziliyalik hujumchi faoliyati davomida APLda ilk marta xet-trikni rasmiylashtirdi.

"Liverpul" ikkinchi o‘rindagi "Tottenxem"dan 9 ochkoga ilgarilab ketdi. Uchinchi o‘rindagi "Manchester Siti" o‘z o‘yinini ertaga o‘tkazadi.

Angliya premyer-ligasi, 20-tur
Liverpul – Arsenal 5:1 (4:1, 1:0)
Gollar: 0:1 – 11 Meytlend-Naylz, 1:1 – 14 Firmino, 2:1 – 16 Firmino, 3:1 – 32 Mane, 4:1 – 45, penalti Saloh, 5:1 – 65, penalti Firmino.
Liverpul – Alisson, Lovren, Robertson (Klayn, 83), Aleksander-Arnold, van Deyk, Veynaldum (Lallana, 78), Fabinyo, Shakiri, Mane (Xenderson, 62), Firmino, Saloh.
Arsenal – Leno, Papastatopulos, Mustafi (Kosyelni, 46), Kolashinas (Genduzi, 80), Lixtshtayner, Jaka, Meytlend-Naylz, Remzi, Torreyra, Ivobi, Obameyang (Lyakazett, 71).
Ogohlantirishlar: Robertson (26), Jaka (33), Lixtshtayner (90).