Yakuniga yetib borayotgan 2018 yil o‘zbekistonlik sportchilar uchun sermahsul va omadli bo‘ldi, desak mubolag‘a bo‘lmaydi. Shu kunlarda Jismoniy tarbiya va sport vazirligi tizimidagi sport-ta’lim muassasalarida “2018 – Faol tadbirkorlik va innovasion g‘oyalar va texnologiyalarni qo‘llab-quvvatlash yili” davomida amalga oshirilgan ishlarni sarhisob qilish va yangi 2019 yilni munosib kutib olish maqsadida bayram tadbirlari tashkil etilmoqda.
Shunday tadbirlardan biri 27 dekabr kuni Andijon ixtisoslashtirilgan olimpiya zaxiralari maktab-internati tashkil etildi. “Yangi yilga yangi marralar bilan” bilan shiori ostida tashkil etilgan bayram tadbirida maktab jamoasi, o‘quvchilar va ularning ota-onalari ishtirok etib, yangi yil shukuhidan bahramand bo‘lishdi.
Ayniqsa, o‘quvchilar tomonidan tomonidan she’r va raqslar, sahna ko‘rinishlari yig‘ilganlarga bayramona kayfiyat ulashdi. Turli xil ertak qahramonlari, Qorbobo va Qorqiz timsollari yosh sportchilar tomonidan mohirona ijro etildi. Shuningdek, bayramga viloyat qo‘g‘irchoq teatri san’atkorlari ham taklif etilib, o‘quvchilarga bayram dasturini namoyish qilishdi.
Tadbirda viloyat hokimligi va jismoniy tarbiya va sport boshqarmasi mutasaddilari barchani bayram bilan tabriklab, iqtidorli va ijtimoiy himoyaga muhtoj o‘quvchilarga viloyat hokimligi hamda homiylar tomonidan ajratilgan qimmatbaho sovg‘alar, sport liboslari va anjomlarni topshirishdi.
Yangi yil bayramiga atalgan tadbir o‘quvchilarda chuqur taassurot qoldirib, yoshlar kirib kelayotgan 2019 yilda katta marralarni zabt etishni o‘zlariga maqsad qilib olishdi.
Shu kabi bayram tadbirlari respublikamizda barcha sport ta’limi muassasalarida tashkil etildi.
