«Milliy sport mukofoti-2018» laureatlari bilan intervyularni e’tiboringizga havola qilishda davom etamiz. «Yilning eng yaxshi murabbiyi» yo‘nalishida boks bo‘yicha O‘zbekiston terma jamoasi ustozi Marat Qurbonov g‘alaba qozondi.
«Boks mamlakatimizda yaxshigina ommalashgan. O‘zbekistonning turli hududlarida bolalar sportning ushbu turi bilan shug‘ullanadilar. O‘z navbatida biz ham eng kuchli sportchilarni tanlab, ularni tarbiya qilyapmiz. Boksni yanada kuchaytirish yo‘lida harakat qilmoqdamiz. 2018 yil boksimiz uchun ulkan g‘alabalarga boy bo‘ldi. Birinchi navbatda Jakartadagi Osiyo o‘yinlarini qayd etishni istardim. U yerda biz barcha – 7 ta vazn toifasida muvaffaqiyatli ishtirok etdik. Sportchilarimiz ishonchni oqlay olishdi. Mirzahalilov, Baturov kabi bokschilar kashf etildi. Avvallari ular zaxira tarkibi a’zosi hisoblanardilar. Endi esa Osiyo o‘yinlarida oltin medalga ega chiqishdi. Yoshlarimizdan esa Xalakov haqida gapirishim mumkin. U boks olamida dastlabki qadamlarini tashlamoqda. O‘smirlar Olimpiadasida chempion bo‘ldi. Bizda hali birgalikda ish olib borayotgan iste’dodli sportchilar ko‘p. Shuningdek, professional ringdagi charm qo‘lqop ustalarimiz ham bor. Ular prof boksda 15 ta jang o‘tkazgunga qadar havaskorlar o‘rtasidagi musobaqalarda qatnashishlari mumkin. Taqdirlash marosimi haqida gapiradigan bo‘lsam, ko‘rsatilgan e’tibor uchun minnatdorchilik bildirmoqchiman. Barchaga kirib kelayotgan yangi yil muborak bo‘lsin», – dedi Marat Qurbonov.
«Yilning eng yosh va istiqbolli sportchisi» sifatida Abdumalik Xalakov tan olindi. Yosh bokschi 2018 yilda jahon va Osiyo chempionatida, shuningdek, o‘smirlar Olimpiadasida oltin medalni qo‘lga kiritdi.
«Mas’uliyatli yil bo‘ldi. Men o‘zimni faqatgina g‘alabaga tayyorlagandim. Rejalarimizning barchasini amalga oshira olganimdan xursandman. Oldimizda turgan 2019 yil yanada qiyin bo‘ladi. Ushbu yo‘nalishda g‘alaba qozonganimdan mamnunman. Mehnatimni e’tirof etgani uchun Milliy olimpiya qo‘mitasidan minnatdorman. Bu meni navbatdagi g‘alabalar sari chorlaydi va yanada kuchaytiradi», – dedi Abdumalik.
