2-yanvar tongida yurtimiz termasi BAA ga uchib ketishdi. Ularni millionlab futbol muxlislari esa ortlaridan qarab qolishdi… Alloh bir og‘iz «Bo‘l» degan so‘z bilan butun borliqni yaratganini hammamiz juda ham yaxshi bilamiz. Ota- bobolarimiz bejiz : Dunyo so‘zdan yaralgan, har bir aytilayotgan so‘z moddiylashadi,deb aytishmagan. Oldinda termamiz uchun mashaqqatli sinovlar turibdi. Hozirda jamoamiz biz kutgan darajada kuchli bo‘lmasligi mumkin, balki ko‘pchilik kutgan natijani yangi murabbiy ko‘rsata olmayotgandir, yana kimdir UFA dan norozidir, yana allaqanday ginalar bordek, lekin keling hammasini unutamiz, bir jamoa bo‘lib, yahlit bir musht bo‘lib jipslashamiz! Hamma gina-kudratlar,norozilklarni uzog‘i bilan bir oyga yoddan chiqarib turamiz.

  O‘zbek futboli haqida negativ komentlar, salbiy fikrlar yozishni ham, ishonchsizlik bildirishni ham o‘zbekona bag‘rikenglik bilan to‘xtatamiz!

   Men termamiz safidagi ba’zi o‘yinchilar bilan suhbatlashib turaman. Ana shunday suhbatlarimdan birida Anzur Ismoilov qiziq bir gap aytgandi: Abramov Osiyo kubogida termamiz futbolchilariga internetga kirishni man qilib qo‘ygan ekan. Men xayron bo‘lib so‘ragan edim: «Iya sizlar ham o‘zbek saytlarini o‘qiysizlarmi deya?» Shunda Anzur :Albatta, deyarli hamma futbolchilar «Chempionat.asia» va «Stadion.uz» saytlarini muntazam kuzatib borishadiku,- deya ajablangan edi.

  Sizning har bir negativ koment yoki fikringiz, albatta, o‘z egasiga yetib boradi. Borganda ham u futbolchining faqat g‘oliblik ruhini sindiradi, o‘ziga bo‘lgan ishonchini kamayishiga olib keladi. Dunyo olimlari so‘zning qanchalar katta qudratga ega ekanligini fanda ham isbotlab berishgan. Keling janob Kuper: «Chempion bo‘lamiz»,- deb aytgan so‘ziga ta’sir ko‘rsataylik. Hammamiz shu so‘zni qaytaraylik va shu so‘zga ishonaylik…

 Shu yigitlar yurtimiz bayrog‘I tushirilgan liboslarda siz bilan biz yashayotgan ona yurtimiz sharafini himoya qilish uchun musofirdek begona yurtga ketishdi. Ularga bo‘lgan hamma salbiy hislarni bir chetga surib qo‘yib shunchaki «Biz, albatta, chempion bo‘lamiz» deb ayting va bunga ishoning ! Aynan bir xalq bo‘lib jipslashib shu yigitlarga ishonishning ayni vaqti ekanligini sezgan bo‘lsangiz kerak!

  O‘zbekiston qahramoni Abdulla Oripov aytganidek: Qachon xalq bo‘lasan sen, ey olamon! Xalq bo‘lish vaqti yetdi.

  O‘zbekiston xalq shoiri Muhammad Yusuf aytganidek : «Xalq bo‘l, elim»!

  Maqolam so‘nggida futbolchilarimizga ham ikki og‘iz: Yurakdan o‘ynang yigitlar, o‘yinlaringizni ko‘rib yuraklarimiz hapqirib ketsin. Boringizni berib o‘ynang yigitlar, toki birorta muxlis men bundan yaxshi o‘ynar edim deya olmay qolsin! Bizning chempionlik haqidagi orzularimiz sizlar-la ushalsin!

 Olg‘a «Oq bo‘rilar!»

                                                                                   Yahyoxo‘ja Ulug‘xo‘jayev