Kecha, 1 yanvar kuni O‘zbekiston Respublikasining Ummon Sultonligidagi elchisi Anvar Abduhalimov mamlakat ot sporti federasiyasi prezidenti Al Said Munzir bin Sayf bin Hamad al Busaidi bilan uchrashuv o‘tkazdi. Bungacha Al Said Munzir sentyabr oyida yurtimizga tashrif buyurib, ot sportini rivojlantirishda mamlakatlar o‘rtasida hamkorlikni kuchaytirish bo‘yicha muzokara olib borgandi.
Kecha tashkil etilgan uchrashuvda ham O‘zbekistonda yilqichilik va ot sportini rivojlantirish istiqbollari, o‘zbekistonlik mutaxassislarning malaka oshirish dasturlarida ishtirok etishi, ummonlik chavandozlarning O‘zbekistondagi musobaqalarda qatnashishi masalalari muhokama qilindi.
2019-2020 yillarda O‘zbekistonda ot sporti maktablarining moddiy-texnik bazasini rivojlantirish rejalashtirilmoqda. Uchrashuvda elchi Abduhalimov mazkur islohotlarda ummonlik do‘stlar faol ishtirok etishlariga umid qilishini aytib o‘tdi.
Shuningdek, maktablarda imkoniyati cheklangan bolalar uchun ham sharoitlar yaratishga alohida e’tibor qaratiladi. Bundan tashqari, loyiha doirasida otxonalar quriladi, otlar uchun maxsus inventarlar xarid qilinadi.
