Xabaringiz bo‘lsa kerak, «Andijon» jamoasining uy o‘yinlari o‘tkaziladigan «Sog‘lom avlod» stadionida yangi mavsumga tayyorgarlik ishlari jadal sur’atda olib borilmoqda.
O‘zbekiston professional futbol ligasining talabiga binoan eng avvalo maydon sifatini yaxshilash hamda stadionda muxlislarga qulaylik yaratish maqsadida tribunadagi o‘rindiqlarni butunlay yangitdan qilish, hisobni aks ettiruvchi elektron tablo, homiy tashkilotlarning video-roligini reklama qilib boruvchi maxsus elektron tablolarni zamonaviy ko‘rinishga keltirish bo‘yicha viloyat hokimi mas’ul shaxslarga topshiriq bergandi.
Mazkur ishlarning qay darajada olib borilayotganini shaxsan viloyat hokimining o‘zi nazorat qilib bormoqda.
Jumladan bugun erta tongda Andijon viloyati hokimi Shuhratbek Abdurahmonov «Sog‘lom avlod» stadioniga tashrif buyurib, homiy tashkilotlar o‘rtasida navbatdan tashqari yig‘ilish o‘tkazdi.
Unda shu kungacha qilingan ishlar va kelgusida qilinishi zarur bo‘lgan ishlar bo‘yicha so‘z bordi.
Viloyat hokimi yig‘ilishda Andijon xalqini kayfiyatini yanada ko‘tarish uchun futbolga katta e’tibor qaratilishini kuyunib gapirdi va endilikda korxona va muassasalar o‘rtasida ham futbol bo‘yicha «Hokim Kubogi-2019» musobaqasini tashkil etish bo‘yicha topshiriq berdi.
«Andijon» matbuot xizmati.
