Хабарингиз бўлса керак, «Андижон» жамоасининг уй ўйинлари ўтказиладиган «Соғлом авлод» стадионида янги мавсумга тайёргарлик ишлари жадал суръатда олиб борилмоқда.
Ўзбекистон профессионал футбол лигасининг талабига биноан энг аввало майдон сифатини яхшилаш ҳамда стадионда мухлисларга қулайлик яратиш мақсадида трибунадаги ўриндиқларни бутунлай янгитдан қилиш, ҳисобни акс эттирувчи электрон табло, ҳомий ташкилотларнинг видео-ролигини реклама қилиб борувчи махсус электрон таблоларни замонавий кўринишга келтириш бўйича вилоят ҳокими масъул шахсларга топшириқ берганди.
Мазкур ишларнинг қай даражада олиб борилаётганини шахсан вилоят ҳокимининг ўзи назорат қилиб бормоқда.
Жумладан бугун эрта тонгда Андижон вилояти ҳокими Шуҳратбек Абдураҳмонов «Соғлом авлод» стадионига ташриф буюриб, ҳомий ташкилотлар ўртасида навбатдан ташқари йиғилиш ўтказди.
Унда шу кунгача қилинган ишлар ва келгусида қилиниши зарур бўлган ишлар бўйича сўз борди.
Вилоят ҳокими йиғилишда Андижон халқини кайфиятини янада кўтариш учун футболга катта эътибор қаратилишини куюниб гапирди ва эндиликда корхона ва муассасалар ўртасида ҳам футбол бўйича «Ҳоким Кубоги-2019» мусобақасини ташкил этиш бўйича топшириқ берди.
«Андижон» матбуот хизмати.
