Anchadan buyon rasmiy o‘yinda maydonga tushmagan termamiz bugun katta kuch bilan juda qiyin kechgan uchrashuvda irodali g‘alabaga erishdi. Ummon termasi ochiqchasiga 1-raqamda harakat qildi. Termamiz ham bunga monelik qilmadi.

Biznikilarning birinchi goli oldindan ishlangan standart evaziga qo‘lga kiritilganini darrov sezgan bo‘lsangiz kerak. O‘tkazib yuborilgan golimizda esa Ummon termasi hujumchisi deyarli yarim metrlik ofsaydda edi. Hakamlar bu xatolarini bahsli penaltini bermay yuvib yuborishdi desak, haqiqatdan bo‘ladi.

Ektor Kuper taktikasining nomini qo‘rqmay «validol» taktikasi deya atasak bo‘ladi. Sababi, bu uchrashuvni validolsiz ko‘rish juda qiyin bo‘ldi. Tan olish kerak, bugun Kuperning zahiradan jangga tashlagan futbolchilari o‘yin taqdirini hal qilishdi. To‘gri va o‘z vaqtida qilingan o‘yinchi almashtrilishlari bizga o‘ta muhim uch ochkoni olib keldi.

Keling, tan olaylik, bugun Nesterov o‘zining eng zo‘r uchrashuvlaridan birini o‘tkazdi. U jamoamizni birinchi taymning o‘zidayoq bir necha bor yuz foizlik vaziyatlardan ochiqchasiga qutqardi. Ahir, bejiz aytishmaydiku «Yaxshi darvozabon - yarim jamoa» deb. Bugun Ahmedovning o‘yini oldida bosh kiyimimizni yechmasdan ilojimiz yo‘q. U haqiqiy sardorlarga hos uchrashuv o‘tkazdi.

Bu turnirda fovaritlarga oson bo‘lmayotganiga qaraganda, termamiz birinchi imtihonni a’loga topshirdi. Bu katta turnir ekanligini hisobga olsak, boshlanishi chakki emas. Faqat, o‘yin uslubi ustida ko‘proq ishlash kerak. Jamoamizning bundan keyingi uchrashuvlarigacha yaxshilab o‘ylab olib, xatolar ustida ishlashlari uchun vaqt yetarli. Jamoamizga navbatdagi uchrashuvlarda faqat va faqat g‘alabalar tilan qolamiz. Olg‘a O‘zbekiston!