Анчадан буён расмий ўйинда майдонга тушмаган термамиз бугун катта куч билан жуда қийин кечган учрашувда иродали ғалабага эришди. Уммон термаси очиқчасига 1-рақамда ҳаракат қилди. Термамиз ҳам бунга монелик қилмади.

Бизникиларнинг биринчи голи олдиндан ишланган стандарт эвазига қўлга киритилганини дарров сезган бўлсангиз керак. Ўтказиб юборилган голимизда эса Уммон термаси ҳужумчиси деярли ярим метрлик офсайдда эди. Ҳакамлар бу хатоларини баҳсли пеналтини бермай ювиб юборишди десак, ҳақиқатдан бўлади.

Эктор Купер тактикасининг номини қўрқмай «валидол» тактикаси дея атасак бўлади. Сабаби, бу учрашувни валидолсиз кўриш жуда қийин бўлди. Тан олиш керак, бугун Купернинг заҳирадан жангга ташлаган футболчилари ўйин тақдирини ҳал қилишди. Тўгри ва ўз вақтида қилинган ўйинчи алмаштрилишлари бизга ўта муҳим уч очкони олиб келди.

Келинг, тан олайлик, бугун Нестеров ўзининг энг зўр учрашувларидан бирини ўтказди. У жамоамизни биринчи таймнинг ўзидаёқ бир неча бор юз фоизлик вазиятлардан очиқчасига қутқарди. Аҳир, бежиз айтишмайдику «Яхши дарвозабон - ярим жамоа» деб. Бугун Аҳмедовнинг ўйини олдида бош кийимимизни ечмасдан иложимиз йўқ. У ҳақиқий сардорларга ҳос учрашув ўтказди.

Бу турнирда фоваритларга осон бўлмаётганига қараганда, термамиз биринчи имтиҳонни аълога топширди. Бу катта турнир эканлигини ҳисобга олсак, бошланиши чакки эмас. Фақат, ўйин услуби устида кўпроқ ишлаш керак. Жамоамизнинг бундан кейинги учрашувларигача яхшилаб ўйлаб олиб, хатолар устида ишлашлари учун вақт етарли. Жамоамизга навбатдаги учрашувларда фақат ва фақат ғалабалар тилан қоламиз. Олға Ўзбекистон!