Ikki yillik tanaffusdan so‘ng yana kuchlilar safiga qaytgan “Andijon” jamoasi yangi mavsumga astoydil tayyorgarlik ko‘rmoqda.

Ildar Sakayev boshqaruvidagi “burgutlar” ayni damda o‘quv-yig‘inni Toshkentda olib bormoqda. Fursatdan foydalanib, bosh murabbiyning fikrlari bilan qiziqdik.

-  Yangi mavsumga tayyorgarlikni dekabr oyidayoq boshlagandik. Avvaliga Andijonda qisqa muddatli yig‘in tashkil etildi. U yerda asosan o‘tgan yilgi tarkibda xarakat qilgan futbolchilar va mahalliy o‘yinchilar ko‘rikdan o‘tkazildi. 9 yanvardan esa Toshkentga keldik. Bu yerda rejaga ko‘ra tarkibga bir qator yangi o‘yinchilar kelib qo‘shilgan. Shu o‘rinda klubimiz vise-prezidenti Ma’rufjon Abdisalomovga jamoaning yangi mavsumga har tomonalama puxta tayyorgarlik ko‘rishi uchun qulay sharoitlarni yaratib berayotgani va doimo bizga yordam qo‘lini cho‘zayotgani uchun minnatdorchilik bildiraman. Jamoamiz Toshkentdagi muhtasham “O‘zbekiston” mehmonxonasida istiqomat qilib, “Turin” stadionida mashg‘ulot o‘tkazmoqda. Sharoitlar yuqori saviyada tashkil etilgan.

-  Toshkentdagi yig‘in chog‘ida bir nechta nazorat o‘yinlarini tashkil etish rejadan o‘rin olgan. Bu orqali biz tarkibda shug‘ullanayotgan futbolchilarning imkoniyatlarini yanada chuqurroq bilib olamiz va o‘ylagan taktik sxemaga moslashtirishga urinamiz.

-  Rahbariyat bu yil debyutant bo‘lishimizga qaramay, Superdligada ham yuqori o‘rinni egallashni oldimizga vazifa qilib belgilagan. Shunga monand tarkibni kuchaytirish maqsadida, seleksiya ishlari bilan keng qamrovda ish olib bormoqdamiz. Yangi futbolchilarning taklif etilishidan oldin albatta rahbariyat bilan bu mavzuda maslahatlashgan xolda, ish tutmoqdamiz. Shu kunga qadar o‘nga yaqin yangi futbolchilar jamoaga taklif etildi. Biz bu bilan seleksiya ishlarini yakulanmoqchi emasmiz. Superligada har bir o‘yin haqiqiy jang bo‘ladi. Muxlislar bizdan faqat g‘alaba kutadi. Shunga monand tarkib shakllantirilmasa, xarakatlarimiz zoye ketishini tushunib turibmiz. Ichki imkoniyatdan kelib chiqib, xorijlik futbolchilarning limitidan ham to‘liq foydalanish niyatidamiz. Bu bo‘yicha ham hozirda izlanishdamiz va aytishim mumkinki, bugungi kunda ham ayrim legionerlarni ko‘rikka taklif etib, ularni ko‘zdan kechiryapmiz. Legioner futbolchilar katta pulga keladi. Shunday ekan, ularni tanlashda adashmaslik zarur deb bilaman.

-  Rejamizga ko‘ra, fevral oyida Turkiyaning Antaliya shahrida xorij yig‘inini tashkil etilishi ham o‘rin olgan. Unga qadar, tarkibni aniqlashtirib olishimiz shart – deydi Ildar Usmanovich.