Ertaga muhim o‘yin kutmoqda. Yaponiyaga qarshi. Ko‘p bor o‘ynaganmiz bu grand jamoa bilan. Statistikamiz maqtanarli darajada emas.   Atigi bitta o‘yinda g‘alaba qozonganmiz. O‘sha Aleksandr Shadrin gol kiritgan 2012 yil qishining so‘nggi kunidagi o‘yinda. Mana yana imkoniyat. Butkul boshqa jamoa, boshqa murabbiy bilan o‘ynaymiz ertaga. Rasmiy  musobaqadagi rasmiy o‘yin. Guruh g‘olibini aniqlab beradigan o‘yin.

Bugungi mashg‘ulotlar ajoyib tarzda o‘tdi. Futbolchilarimizning kayfiyati a’lo darajada. Matbuot anjumanida qatnashgan Javohir Sidiqovning bir gapi yoqdi menga. “O‘ylab qarasam, Yaponiyaga qarshi o‘smirlar va yoshlar terma jamoalari tarkibida ko‘p bor o‘ynaganman. Shu paytga qadar ulardan mag‘lubiyatga uchramagan ekanman. Ertaga milliy terma jamoa tarkibida ham g‘alaba qozonishga harakat qilamiz!” Bu g‘oliblik ruhidan dalolat. Mana shunday g‘oliblik ruhi ayni paytda barcha futbolchilarimizda bor.

Bugun komissar ishtirokidagi mitingda Yaponiya terma jamoasi matbuot xizmati xodimi bilan tanishdim. Nihoyatda odobli va muloyim qiz ekan. Barcha yaponlarga xos bo‘lgan xislat. “Kecha jurnalistlarimiz terma jamoangizni mashg‘ulotini yoritishga borishibdi. Ular bilan bog‘liq hech qanday muammo yuzaga kelmadimi? Aytilgan vaqtda mashg‘ulotni tark etishdimi?” – deb so‘rab qoldi. “Yo‘q, hech qanday muammo bo‘lmadi. Qaytanga, jurnalistlaringizning tartib-qoidaga so‘zsiz bo‘ysunishi va nihoyatda tavoze’li ekanligi meni lol qoldirdi”, - dedim. 

Mashg‘ulotdan keyin yana ikkita jurnalist mehmonxonaga Fozil Musayevni izlab kelishdi. Fozildan intervyu berishni so‘ragandim: “Kecha intervyu olishgandi. Yanami?” – dedi ajablanib.

Men tushuntirdim. “Yaponiyalik jurnalistlar nihoyatda ko‘p, ularning barchasi terma jamoamizga katta qiziqish bildirishyapti. Uzoq masofadan yo‘l bosib, mehmonxonamizga Sizni qidirib kelibdi. Intervyuga ozgina vaqt ajratsak, juda xursand bo‘lishadi”, - dedim. Fozil rozi bo‘lib, yaponiyalik jurnalistlarga intervyu berdi. Ba’zi savollarga inglizcha, ba’zilariga esa yapon tilida javob bergani jurnalistlarni chinakamiga hayron qoldirdi va Fozilga bo‘lgan hurmatlari ikki karra oshib ketganini guvohi bo‘ldim.

Ertaga tarkibda o‘zgarishlar bo‘lishi mumkin. Mister o‘ziga xos reja tayyorlab qo‘ygan ertangi o‘yinga. Barcha rejalarimiz amalga oshib, yuzimiz yorug‘ bo‘lishini tilab qolamiz!    Yoqubjon Bobojonov, O‘FA Matbuot xizmati