Toshkentning “Bunyodkor” klubi ukrainalik futbolchi Sergey Simonenko oldidagi qarzlaridan qutuldi. Bu haqda hamkasbimiz Diyor Imomxo‘jayev ijtimoiy tarmoqdagi sahifasida xabar bermoqda.

“Etib kelgan ma’lumotga ko‘ra, “Bunyodkor” ukrainalik legioner Sergey Simonenko oldidagi qarzlarini to‘lab bergan. Ya’ni, 2014 yildan buyon hal qilinmay kelayotgan masala klub rahbariyatida o‘zgarish bo‘lganiga tahminan bir haftacha o‘tib o‘z yechimini topgan. Avvalroq FIFA shu ish yuzasidan “Bunyodkor”ni Superligadagi 6 ochkosidan mosuvo qilgandi. Keyinroq esa tashkilot klubni quyi ligaga tushirib yuborish sanksiyasi haqida ogohlantirgandi.

Endilikda “Bunyodkor” Sergey Lushchan masalasini hal qilishi kerak. O‘FA mutaxassis uchun 2016 yilning mayidan boshlab qolib kelayotgan pulni to‘lab berish bo‘yicha qaror chiqargandi. Biroq Lushchan bunga qanaot qilmay, sudga murojaat qildi. Endilikda ish O‘FA tasarrufidan chiqib ketgan.

Simonenko agar uning hisobiga pul kelib tushsa, ayni vaqtda O‘zbekiston bankida saqlanayotgan pulini “Bunyodkor”ga qaytarib berishga va’da bergandi. Futbolchi o‘z va’dasida tursa, Toshkent klubida Lushchan bilan ishni hal qilish uchun ham imkoniyat paydo bo‘ladi.

Shuningdek, FIFA Doston Hamdamov transferi borasida o‘z qarorini e’lon qilsa, “Bunyodkor” uning orqasidan ham pul ishlab olishi mumkin bo‘ladi”, deya yozadi Diyor Imomxo‘jayev.