Тошкентнинг “Бунёдкор” клуби украиналик футболчи Сергей Симоненко олдидаги қарзларидан қутулди. Бу ҳақда ҳамкасбимиз Диёр Имомхўжаев ижтимоий тармоқдаги саҳифасида хабар бермоқда.
“Етиб келган маълумотга кўра, “Бунёдкор” украиналик легионер Сергей Симоненко олдидаги қарзларини тўлаб берган. Яъни, 2014 йилдан буён ҳал қилинмай келаётган масала клуб раҳбариятида ўзгариш бўлганига таҳминан бир ҳафтача ўтиб ўз ечимини топган. Аввалроқ ФИФА шу иш юзасидан “Бунёдкор”ни Суперлигадаги 6 очкосидан мосуво қилганди. Кейинроқ эса ташкилот клубни қуйи лигага тушириб юбориш санкцияси ҳақида огоҳлантирганди.
Эндиликда “Бунёдкор” Сергей Лушчан масаласини ҳал қилиши керак. ЎФА мутахассис учун 2016 йилнинг майидан бошлаб қолиб келаётган пулни тўлаб бериш бўйича қарор чиқарганди. Бироқ Лушчан бунга қанаот қилмай, судга мурожаат қилди. Эндиликда иш ЎФА тасарруфидан чиқиб кетган.
Симоненко агар унинг ҳисобига пул келиб тушса, айни вақтда Ўзбекистон банкида сақланаётган пулини “Бунёдкор”га қайтариб беришга ваъда берганди. Футболчи ўз ваъдасида турса, Тошкент клубида Лушчан билан ишни ҳал қилиш учун ҳам имконият пайдо бўлади.
Шунингдек, ФИФА Достон Ҳамдамов трансфери борасида ўз қарорини эълон қилса, “Бунёдкор” унинг орқасидан ҳам пул ишлаб олиши мумкин бўлади”, дея ёзади Диёр Имомхўжаев.
