Ispaniya Kubogi chorak final ilk bahsidan o‘rin olgan "Real» Madrid" va "Jirona" uchrashuvi bo‘lib o‘tdi. "Santyago Bernabeu" o‘yingohida bo‘lib o‘tgan o‘yin mezbonlarning irodali g‘alabasi bilan tugadi.

O‘yinning 7-daqiqasidayoq mehmonlar ilk xavfli hujumlarini gol bilan yakunlashdi. Entoni Losano chap qanotdan uzatib berilgan to‘pni yaqin masofadan madridiklar darvozasiga joylab qo‘ydi.

Bunga maydon eagalari birinchi bo‘limdayoq ikkita to‘p bilan javob qaytarishdi. 18-daqiqada o‘ng qanotdan tashkil qilingan hujumni Lukas Vaskes muvaffaqiyatli yakunladi. Birinchi bo‘lim yakunlanishi arafasida Vinisius Junior raqib jarima maydonida qo‘pollik bilan to‘xtatildi, penaltini Serxio Ramos aniq bajardi.

66-daqiqada Markos Lyorente o‘z jarima maydonida qo‘li bilan o‘ynadi, natijada belgilangan penaltini Aleks Granel aniq bajarib muvozanatni tikladi. Shundan keyin qaymoqranglilar yana hujumga zo‘r berishdi.

77-daqiqada Ramos Marselo tomonidan uzatib berilgan to‘pni boshi bilan darvozaga joylab yana jamoasini oldinga olib chiqqan bo‘lsa, oradan ko‘p o‘tmay Vinisiusning uzatmasidan so‘ng Karim Benzema bo‘sh qolgan darvozani ishg‘ol qilib jamoasining to‘rtinchi golini urdi.

Shu tariqa, "Real" 31 yanvarda bo‘lib o‘tadigan javob o‘yini oldidan o‘zi uchun qulay hisobni qayd etib oldi.

Ispaniya Kubogi

Chorak final, ilk o‘yin

Real Madrid – Jirona 4:2 (2:1, 2:1)

Gollar: 0:1 – 7 Losano, 1:1 – 18 Vaskes, 2:1 – 42, penalti Ramos, 2:2 – 66, penalti Granel, 3:2 – 77 Ramos, 4:2 – 80 Benzema.

Real Madrid – Kurtua, Ramos, Marselo, Odriosola, Nacho, Modrich (Kroos, 63), Kazemiro (Lyorente, 59), Vaskes, Sebalyos (Isko, 70), Vinisius Junior, Benzema.

Jirona – Iraysos, Xuanpe, Munyesa, Raul Garsiya, Alkala (Espinosa, 46), Garsiya (Payk Sin Xo, 59), Duglas Luis, Granel, Ramalyo, Losano (Portu, 78), Dumbiya.

Ogohlantirishlar: Alkala (36), Nacho (45), Ramos (62), Lyorente (66).